Loading...

Rwanda-Ubutinganyi yabutewe n’akamenyero ko kurarana n’umukobwa mugenzi we!

Umulisa ( izina ryahinduwe) utuye mu Kagari ka Mumena mu Murenge wa Nyamirambo mu Mujyi wa Kigali, avuga ko kugira akamenyero ko kurarana n’abakobwa bagenzi be ariyo ntandaro yo kuba umutinganyi.

Umulisa ni umukobwa ufite imyaka 26; arananutse, akunze gusabana mu buzima cyane cyane asabana n’abakobwa bagenzi be.

Mu kiganiro kirambuye yagiranye na IGIHE,avuga ko atavutse ari umutinganyi nk’uko bigaragara kuri bamwe ahubwo ko yagiye ahinduka buhoro buhoro ahanini bitewe no gukunda kurarana n’abakobwa.

Umulisa yaryamanye na mugenzi we w’umukobwa bwa mbere afite imyaka 19 ubwo yigaga mu mashuri yisumbuye mu Ntara y’Iburasirazuba.

Yemeza ko umukobwa bararanaga ari we watumye aba umutinganyi bitewe n’ibyo bakoranaga buri gihe nijoro bagiye kuryama.

Yagize ati “Byatangiye agenda ankorakora buhoro buhoro ariko kuko byari ibintu ntasanzwe menyereye nkajya mwangira ariko bitewe n’uko yari inshuti yanjye cyane kandi twiga mu ishuri naje gushiduka naramuretse ankorakora ahantu hose tunasomana, nanjye nza gutangira kubikunda.”

Yongeraho ko no mu biruhuko aba bakobwa basuranaga iwabo bakabihakorera ntacyo bishisha bikageza aho biba akamenyero ndetse agera igihe cyo kurangiza amashuri yisumbuye yarazinutswe abahungu burundu.

Yakomeje ate ubutinganyi

Umulisa yabwiye IGIHE ko yakomeje gukundana n’uyu mukobwa bitewe n’uko bose bari batuye i Kigali kuko kubonana bitabagoraga.

Ati “Kubera ko iyo yanshakaga cyangwa njye mushaka twabonanaga uko tubyifuje nashidutse byaranyinjiyemo cyane ndetse biniyongera nyuma y’uko amaze kunyereka n’abandi bakobwa bakundana bituma ntangira kumva ko kuba nkundana na mugenzi wanjye ntaciye inka amabere.”

Ntakozwa ibyo kubyara…

Yagize ati “Kubyara si wo mushinga kandi nzi ko hari n’ababana badahuje ibitsina batabyara ku buryo rero kuba ntashobora kubyara ari byo byambera ikibazo ikindi kandi buri wese agira imitekerereze n’imyumvire ye.”

Afatwa ate muri sosiyete nyarwanda?

Ati “Mu rugo nta n’umwe uzi ko nkundana na bagenzi banjye duhuje igitsina kuko mama bigeze kubimubwira arabimbaza muhakanira nivuye inyuma na we ahita ambwira ko yabwiye uwabimubwiye ko bidashoboka ku buryo ari cyo gituma nkoresha uburyo bwose bushoboka kugira ngo hatazagira ubimenya n’ubwo bingora cyane.”

Azabihisha kugeza ryari?

Ati “Ubu se simfite uburenganzira bwo gukora ibyo nshaka cyangwa gukundana n’uwo nshatse? Ariko sinshobora kwigaragaza na rimwe kuri buri wese mu gihe nzi neza ko imyumvire y’Abanyarwanda ku mibereho yacu ikiri hasi mu rwego rwo kwanga ko nahinduka iciro ry’imigani.”

Loading...