Nelly ati”Ndi umwana w’uwakoze Jenoside, mama wanjye ubu arimo gukora igihano cy’igifungo cya burundu muri gereza ya Kigali”

Ubuhamya bwa Nelly Mukazayire ,Umuyobozi mukuru mu biro bikuru bya nyakubwahwa Perezida Paul Kagame  ni bumwe mu buhamya  bwakoze abenshi ku mutima,dore ko Nelly yarokotse Genocide yakorewe abatutsi nyamara kandi akaba afite nyina ufunze kubera uruhare yagize muri Genocide.

Ku nshuro ya 22,ubwo Urwanda rwibuka Genocide yakorewe abatutsi mu mwaka w’1994,Nelly Mukazayire,umwe mu barokotse Genocide yakorewe abatutsi ,yatanze ubuhamya imbere  y’umunyamabanga mukuru wa ONU n’imbaga nyamwinshi yiganjemo abayobozi ndetse,ubu buhamya bwa Nelly Bwateye abatari bacye ikiniga.
Kubwa Nelly ngo kuba akora mu biro bya perezida nyamara kandi nyina akaba afungiye muri 1930 azira uruhare yagize muri Genocide ngo ni kimwe mu bishimangira ko abatuye U Rwanda  bahawe uburenganzira bungana.

Nelly ati”
Ndi umwana w’uwakoze Jenoside, mama wanjye ubu arimo gukora igihano cy’igifungo cya burundu muri gereza ya Kigali, kubera uruhare yagize muri Jenoside.  Ndi urugero n’ikimenyetso gifatika cyo kuba abanyarwanda bose bahabwa amahirwe n’uburenganzira bungana mu Rwanda rushya. Nyuma ya Jenoside abanyarwanda babashije kubaka igihugu cyiza, aho umwana w’uwakoze Jenoside n’umwana w’uwayirokotse banganya amahirwe ku burezi, ku buzima, mu kazi no mu myanya y’ubuyobozi. Uko biri kose ariko, inzira yo gukira ibikomere n’ubwiyunge iracyasaba uruhare rwa buri wese”
Nelly yakomeje avuga uko we n’abavandimwe be basigarana na se maze nyina akajya gukora amahano nyamara batazi naho yagiye
ati“Nari mfite imyaka 12 ubwo Jenoside yabaga. Njye n’abavandimwe banjye babiri twari kumwe na papa. Mu gihe cyose Jenoside yabaga, ntabwo twari tuzi aho mama yari ari. Papa yari ahazi ariko ntiyashatse kubitubwira kuko twari tukiri bato cyane kuburyo tutari kubasha kubyiyumvisha. Ku myaka yacu tukiri bato, twatekerezaga ko mama yapfuye. Ku nshuro ya mbere njya kumenya ibya mama, hari mu mwaka w’1996.

nigaga mu mwaka wa kabiri w’amashuri yisumbuye. Umwe mu banyeshuri bagenzi banjye yanyeretse inkuru yari mu kinyamakuru, iriho ifoto ya mama, amazina yanjye n’ay’abavandimwe banjye. Iyo nkuru yari ifite umutwe uvuga ngo Interahamwe ruharwa zafashwe. Uwo wabaye umunsi wanjye mubi kurusha iyindi. Umunsi umwe nabaga ndi uwacitse ku icumu kuko nari mfite papa w’umututsi, nkitwa umwana wacitse ku icumu kuko napfushije abanjye muri Jenoside, ariko mu kandi kanya ngahinduka umwana w’uwakoze Jenoside.”

Ngo nelly yageze igihe inshuti yarafite zimuvaho kuko zamwitaga umushinyaguzi,gusa yaje gufata icyemezo cyo  gusiganuza nyina maze ngo yimenyere ukuri
ati”
“Nafashe icyemezo cyo kwemera ukuri, ntangira kujya mvugana na mama. Byari bikomeye kandi byankomeretsaga umutima. Nashakaga kumenya ukuri ku byabaye ariko muri icyo gihe byari bindenze. Hari ibintu burya utifuza na rimwe kumva ku mubyeyi wawe, byongeye mama wawe. Ukuri nabashije kumenya binyuze mu muti w’ubutabera n’ubwiyunge by’umwihariko w’u Rwanda, ari wo Gacaca.N’ubwo benshi bazinenga cyane cyane cyane abatari abanyarwanda, inkiko Gacaca zadufashije gukira ibikomere.Abarokotse bamenye ukuri kw’ibyabaye ku bantu babo, bamenya aho imibiri yabo yahishwe babasha kuyishyingura mu cyubahiro, n’abakoze Jenoside bahabwa umwanya wo kwibaza bakemera ibyo bakoze bakanabisabira imbabazi, abakatiwe gufungwa bagakora ibihano byabo bafite imitima yamaze kwikiranura

Abantu nkanjye bari bafitanye isano n’abakoze Jenoside kandi bakaba bari bafite inyota yo kumenya mu by’ukuri ibyabaye, igihe cyarageze bamenya ukuri.Gacaca yamfashije kumenya ukuri nari nkeneye ngo mbashe kongera gufungurira umutima mama wanjye. Ntaburyo buhari bwo gusubiranya ibyo yakoze kandi sinzigera na rimwe numva impamvu zatumye abikora, ariko byibuze nari nkeneye kureba niba yabasha kwicuza akanasaba imbabazi mbere y’uko mbasha kumubabarira.Nabashije kwikuraho umutwaro, ntandukanya njye ubwanjye n’ibyaha bye.”

Nelly avuga ko yababariye nyina umubyara.
ati”
“Nk’uko Perezida Paul Kagame yabivuze, ntabwo twasubiza ibihe nyuma kandi ntitwabasha gusubiza ibyangijwe uko byari bimeze, ariko dufite ububasha bwo gutegura ejo hazaza, no gukora ibishoboka ngo twizere ko ibyabaye bitazongera kubaho ukundi. Uyu munsi  sinterwa ishema n’ibya mama yakoze, ariko nanone sinkiri mu mwijima, nahisemo kuwusiga inyuma ngategura inzira yanjye n’amateka yanjye. Numva ntewe ishema no kuba mu gihugu kishishikajwe n’uburenganzira n’ubutabera kuri bose, haba mu mvugo no mu ngiro. Ubwo nari umukobwa muto w’imyaka 14.nabonye uburenganzira bwanjye bwo kubona mama, n’ubu mu myaka 20 ishize kugeza ubu ntabwo nigeze mbuzwa kumubona. Nabashije kwiga ndaminuza, mpatanira imyanya y’akazi itandukanye, imyanga igatangwa hashingiwe ku bushobozi. Nakoze mu biro bya Minisitiri w’intebe, none ubu bwo ndi Umuyobozi mu biro by’umukuru w’igihugu udasanzwe, Perezida Paul Kagame. Ibi bishobora kuba gusa mu gihugu cyamaramaze mu kubahiriza uburenganzira bw’ikiremwamuntu nta vangura.”

Loading...