Nyuma yo kugaruka mu kazi, Karekezi Olivier yagize icyo atangaza ku byo yari afungiwe.

Ibigezweho imikino

Umutoza w’ikipe ya Rayon Sports, Karekezi Olivier warekuwe na Polisi mu cyumweru gishize nyuma y’ibyumweru bibiri afunze yagize icyo atangaza kubyo yari afungiye.

Karekezi yasubiye mu Kazi ke.

Karekezi yatangaje ko yari akurikiranyweho ibyaha byavuzwe ko byakorewe mu ikoranabuhanga, aho ngo mu byo yabajijwe harimo n’ibyo kuba yaragambaniye ikipe y’igihugu ariko uwamushinjaga akaba yaratanze ibimenyetso by’ibihimbano.

Karekezi Olivier yagize ati:”Uko numva Umuvugizi wa Polisi yababwiye, ibintu by’itumanaho, ni uko nanjye nabyumvise nkigera kuri CID (Ishami ry’Ubugenzacyaha), barabimbajije mbasubiza ibiri ku mutima wanjye”. Yakomeje agira ati: “nababwiye ko ntibaza ukuntu nagambanira ikipe y’igihugu kandi ikipe yanjye ya Rayon Sports ifitemo abakinnyi 8 barimo 7 babanzamo, kandi bose bari bafite SMS (ubutumwa bugufi) zanjye mbabwira ko bagomba gukora iyo bwabaga, ndetse n’umutoza wungirije, Mashami, na we mushimira, ariko na none ngashimira inzego zibishinzwe kuko zagerageje kubikurikirana, mbona nanjye ngiye hanze ari nayo mpamvu ndi hano uyu munsi ngo ntangire akazi.”

Karekezi Olivier yakomeje asobanura ko ibyavuzwe by’uko yashatse kugambanira Amavubi ngo asezererwa na Ethiopia hifashishijwe umurozi, na byo yabibajijweho, ariko agaragaza ko haba harabayeho kumwiyitirira.

Yagize ati: “Ni byo koko na byo narabibajijwe, ariko nkeka ko uwabikoze yafashe telefoni ebyiri, hanyuma akura ifoto yanjye kuri internet, kuri WhatsApp hanyuma akajya yandika akanisubiza, kuko bansomera ubwo butumwa basanze harimo ikirundi kandi njye simvuga Ikirundi.Uwabikoze baramukurikiranye, ngirango ni na yo mpamvu byatinze, kuko no muri CID barambwiraga bati ‘turi kubikurikirana kugirango hamenyekane umuntu wabikoze.”

Twibutse ko Karekezi yongeye gusubira mu mirimo ye kuri uyu wa mbere tariki ya 11 Ukuboza 2017 nyuma yo kurekurwa na Polisi mu cyumweru gishize.

 

Source: hose.rw

Review Overview

Ntiwibagirwe gusiga igitekerezo cyawe kuri iyi nkuru

Leave a Reply

Your email address will not be published. Required fields are marked *