Umva amagambo akomeye Cristiano Ronaldo yahise atangaza nyuma yo kwegukana Ballon d’Or 2017.

 

Ku mugoroba wo kuri uyu wa kane tariki ya 07 Ukuboza nibwo Rutahizamu w’ikipe ya Real Madrid, Cristiano Ronaldo, yegukanye igihembo cy’umukinnyi mwiza ku Isi ‘Ballon d’Or’ cya gatanu maze anganya aya mateka na Lionel Messi bahora bahanganye. Ni mu birori byabereye mu Mujyi wa Paris ku Munara wa Tour Eiffel mu Bufaransa.

Ikinyamakuru the Mirror dukesha iyi nkuru cyanditse ko nyuma yo kwegukana iki gihembo cy’imboneka rimwe ,ngo Cristiano Ronaldo yahise atangaza ko atewe ibyishimo byinshi no kuba aciye aka gahigo ndetse anongeraho ko ashimira cyane abakinnyi bagenzi be go mu ikipe ya Real Madrid ndetse na Portugal bamubaye hafi.Yagize ati:” Ndumva nishimye cyane,ni ibihe bidasanzwe mu mwuga wanjye nari maze imyaka myinshi ntegereje.Uyu mwaka wabaye uw’agatangaza kuko twatsinze Champions League na La Liga by’umwihariko nanjye nabaye umukinnyi watsinze ibitego byinshi muri Champions League.Biriya bikombe byadufashije kwegukana ibi bihembo ndetse tugomba gushimira cyane bagenzi banjye bo muri Real Madrid na Portugal kuko baramfashije cyane.”

Ronaldo yafashije Real Madrid kwegukana igikombe cya Shampiyona ya Espagne “La Liga” ayitsindiye ibitego 25 mu mikino 29; ayihesha igikombe cya UEFA Champions League ya 2016-2017 ayitsindiye ibitego 12 mu mikino 13 ndetse umwaka wose urangira atsinze ibitego birenga 42 mu marushanwa yose.

Twibutse ko kandi uyu mugabo w’imyaka 32 y’amavuko, yatowe n’ikinyamakuru France Football nk’umukinnyi wakoze ibidasanzwe mu mwaka ahigitse rutahizamu wa FC Barcelona, Lionel Messi ubundi wari usanzwe afite agahigo ko kwegukana ‘Ballon d’Or’ eshanu, amateka yari yihariye ku isi.

Loading...