CECAFA Kagame Cup 2026: Gor Mahia, Al Hilal SC, Rayon Sports na Jamus FC zitangira neza
Imikino y’umunsi wa mbere wa CECAFA Kagame Cup 2026 yasize amakipe menshi atangiye neza urugendo rwo guhatanira igikombe, aho Gor Mahia FC, Vipers SC, Al Hilal SC, Rayon Sports FC na Jamus FC zabonye intsinzi mu mikino yabanje y’iri rushanwa rihuza amakipe yo muri Afurika y’Iburasirazuba n’iyo Hagati.
Mu Itsinda A, Gor Mahia FC yo muri Kenya yatangiye irushanwa mu buryo bukomeye nyuma yo gutsinda APR FC ibitego 5-0 mu mukino wabereye kuri Stade Amahoro. Iyi ntsinzi yahise ishyira Gor Mahia ku mwanya wa mbere w’itsinda n’amanota atatu ndetse n’ikinyuranyo cy’ibitego 5, ikurikiwe na Vipers SC yo…
muri Uganda yatsinze Garde Républicaine FC yo muri Djibouti ibitego 3-0. APR FC na Garde Républicaine FC ni zo zatangiye nabi nyuma yo gutsindwa imikino yazo ya mbere.
Mu Itsinda B, Jamus FC yo muri Sudani y’Epfo yatangiye neza nyuma yo gutsinda Singida Black Stars FC yo muri Tanzania ibitego 2-0. Iyi kipe ikina iri rushanwa bwa mbere yahise ifata umwanya wa mbere w’itsinda n’amanota atatu, mu gihe Simba SC yo muri Tanzania na Mogadishu City FC yo muri Somalia zanganyije 0-0, buri imwe ibona inota rimwe.
Mu Itsinda C, Rayon Sports FC yo mu Rwanda na Al Hilal SC yo muri Sudani zatangiye neza nyuma yo gutsinda imikino yazo ya mbere ibitego 2-0. Al Hilal SC yatsinze Tusker FC yo muri Kenya ibitego byatsinzwe na Kamaradini Mamudu na Salim Adams, mu gihe Rayon Sports yatsinze KVZ SC yo muri Zanzibar. Kameni Herman Junior yafunguye amazamu kuri penaliti ku munota wa 67, mbere y’uko Daniel Muhoza atsinda igitego cya kabiri ku munota wa 79.
Nyuma y’umunsi wa mbere wa CECAFA Kagame Cup 2026, amakipe yatangiye kugaragaza intego afite muri iri rushanwa. Gor Mahia FC iyoboye Group A, Jamus FC iri imbere muri Group B, mu gihe Al Hilal SC na Rayon Sports FC zihuriye ku manota atatu muri Group C.
Les articles publiés par les utilisateurs engagent uniquement leurs auteurs. YEGOB n’est pas responsable des opinions, informations ou contenus publiés par les utilisateurs. Si un contenu porte atteinte à vos droits ou enfreint la loi, contactez-nous : nous l’examinerons et, si nécessaire, le supprimerons dans les meilleurs délais.
No comments yet. Be the first.