APR FC Yasezereye Les Aigles du Congo, Ikomereza ku Ijonjora rya Nyuma
APR FC yakoze akazi gakomeye imbere y’abafana bayo, itsinda Les Aigles du Congo ibitego 3-0 mu mukino wo kwishyura wa CAF Champions League wabereye kuri Stade Amahoro. Iyi ntsinzi yafashije ikipe y’Ingabo z’u Rwanda guhindura ibyari byabaye mu mukino ubanza, aho yari yatsinzwe 1-0 i Lubumbashi, bityo ikomeza ku giteranyo cya 3-1.
Kapiteni Cheikh Djibril Ouattara ni we wafunguye amazamu ku munota wa 32, nyuma y’umupira wateje urujijo mu rubuga rw’amahina rwa Les Aigles du Congo. Igitego cye cyatumye APR FC yongera kubona icyizere, amakipe yombi ajya kuruhuka APR FC iri imbere, ndetse igiteranyo …
cy’imikino yombi kiba 1-1.
Mu gice cya kabiri, APR FC yakomeje gusatira, maze Ishimwe Christian atsinda igitego cya kabiri ku munota wa 59 ku mupira wavuyemo coup franc. Ku munota wa 74, APR FC yabonye penaliti nyuma y’uko Djibril Ouattara agushijwe mu rubuga rw’amahina, maze uyu kapiteni ayinjiza neza ku munota wa 76, atsinda igitego cya gatatu cy’ikipe ye. Les Aigles du Congo yagerageje kwishyura mu minota ya nyuma, ariko APR FC irakomera mu bwugarizi; ndetse ku munota wa 90+4, Tonny Talasi Madudu yabonye uburyo bukomeye ariko ishoti rye rikubita ku giti cy’izamu.
APR FC yahise ikomeza mu ijonjora rya nyuma rya CAF Champions League, aho izahura n’izakomeza hagati ya Zamalek SC yo mu Misiri na AS Port yo muri Djibouti. Zamalek ni yo ifite amahirwe menshi nyuma yo gutsinda AS Port 2-1 mu mukino ubanza. Kuri APR FC, gutsinda Les Aigles du Congo ni intambwe ikomeye mu rugendo rwo gushaka itike yo gukina imikino y’amatsinda ya CAF Champions League.
Les articles publiés par les utilisateurs engagent uniquement leurs auteurs. YEGOB n’est pas responsable des opinions, informations ou contenus publiés par les utilisateurs. Si un contenu porte atteinte à vos droits ou enfreint la loi, contactez-nous : nous l’examinerons et, si nécessaire, le supprimerons dans les meilleurs délais.
No comments yet. Be the first.