Abatanu barimo abana babiri barokotse urupfu nyuma y’amezi atatu bazerera mu nyanja ya Pasifika

Coast Guard zahagaritse ibikorwa byo kubashakisha nyuma y’iminsi 10 zimaze gushakisha mu nyanja intera ya kilometero zirenga 46,000, zifashishije indege z’ingabo za Amerika zirwanira mu mazi no mu kirere. Ku Cyumweru, abaturage bo ku kirwa cya Fanning ni bo babonye ubwato maze batabara abo bantu batanu.

Umudepite uhagarariye ako gace, Kaotitaake Rakoroa, yavuze ko abarokotse bakiriwe kandi bitabwaho na pasiteri w’itorero rya Uniting Church, nyuma bahabwa ubuvuzi n’abaganga bo kuri icyo kirwa. Yabasabye kujya ku kirwa cya Kiritimati kugira ngo bahabwe ubundi buvuzi. Guverineri wa Leta ya Chuuk, Alexander Narruhn, yashimiye Imana kuba batanu barokotse, ariko avuga ko abandi bane bakomeje kuburirwa irengero. Yanasabye ko ibiganiro bya dipolomasi hagati ya Micronesia na Kiribati byatangira kugira ngo abarokotse basubizwe mu gihugu cyabo. Iyi ni indi nkuru y’ubwato bw’abantu batabawe muri ako gace, nyuma y’uko umusore w’imyaka 18 arokowe amaze iminsi 41 mu nyanja, mu gihe mubyara we bari kumwe yapfuye.